Thursday, April 30, 2020

Whatsapp?

Sapa entara kitai enda nemu utai dikumbai Whatsapp?

Amat nyamai kitai bekuntik pangan diri laban bisi Whatsapp ba smartphone kitai! Enda milih dini alai kitai diau, Whatsapp ulih mai kitai semak enggau pangan diri.

Tang kekadang ka ngasuh pangan ringat ga tegal utai dikunsi sekeda bala ba Whatsapp! Ukai tak sebaka runding siku siku! Bendar meh ngetat ati enggaika tau nyadi laya!

Ni ke fake news ti dikunsi! Sekeda rindu amat beforwardka utai!  Utai ke diforward tak cherita bula! Kati ku enda nemu ngechek dulu enti cherita ke diforward nya amat tauka bula?!

Ni ti bekunsika chukup macham video!  Penuh diri storage ba smartphone laban video ti dikunsi bala! Tak enda dipeda aku video nya ... semadi meh nya ari pangan keras aku!

Taja pia, rindu ga laban Whatsapp.  Enti lelengauka pangan, beWhatsapp meh kitai!





Saturday, December 14, 2013

Ooooha!

Kasih tudah blog, enda diintu!

Nyau lelengau aku meda blog udah bekau ke macha sekeda utai ke bisi ditulis ditu!  Terima kasih Mac I. Watt laban ti baru udah ninggal komen ba blog aku tu! Teperansang asai ati lebuhka macha komen nuan!

Hari beganti bulan, bulan beganti taun, nyau enda berasai lebih setaun ti nadai udah nulis entry ba blog aku tu. Enti ngenang pasal utai ti udah nyadi tauka pengawa ti udah dikerja, mayuh sereta panjai cherita!

Siti ari highlight kami menyanak taun tu iya nya melanchung ke menua South Korea maya musim panas taun tu.  Rindu amat meda menua Seoul taja nya kedua kali aku udah nemuai ke menua South Korea. Keterubah iya suba nyin tengan taun sembilan puluhan ... kiraka kelia menya!

Aku diatu gian amat meda drama Korea, lalu lebuhka ba menua Korea asaika nemu amat pasal menua nya! Pemakai nyamai magang sepi aku, orang manah magang peda aku lalu asaika ukai ba menua orang lebuhka nemuai kin!



Enti nundaka ati, sigi ka meh aku nemuai ke Korea baru!  Ujung minggu nyin kemari udah kami menyanak pulai ari Disneyland bekareh bemalam semalam ba Koreatown di Los Angeles ngambika bisi alai makai pemakai Korea!



Nah tu meh kebuah ti ka ngetu semalam ba Koreatown di Los Angeles sebedau kami angkat pulai ke Galt! Tengukka pemakai Korea!




Au, highlight siti da ba taun tu iya nya nemuai ke Disneyland.  Mentua aku ti spunsa kami menyanak ke Disneyland.  Ini saduai sigi udah besemaya enggau bala anak maya umur saduai manggai sepuluh taun iya deka mai saduai ke Disneyland baru.  Maya umur saduai lima taun suba kami menyanak bisi nemuai ke Disneyland.  Lima taun udah tu ila, iya mai kami ke Disneyland baru.  Udah nya enda iya dapat agi ku iya!

Apu, berentak kami menyanak ba Disneyland! Ari pukul sembilan setengah pagi datai ke maya Disneyland tutup baru kami pulai!  Akai, lelak asai kaki dalam dua hari nya!  Haha, kapa deh, ngambika puas amat amat! Hari chelap, tat! Mensia baka semut dia, tat!



Maya kami pulai ke Galt, kami bisi ngetu ba menua dikumbai Lebec.  Gaga amat bala anak meda nya bisi salju ba menua bebukit dia! Akai dai, chelap amat hari dia laban suhu naka  Celsius.  Dua jam sebedau kami ke datai dia kami bisi ngetu enda lama ba rumah pangan aku di Los Angeles.  Pengangat hari dia maya nya 13° C.  Nah, 2 jam aja penyauh ari LA,  C penyelap menua ba atas bukit!  Iya ga sahari sebedau kami ti datai dia bisi ujan menua ba baruh bukit, badu enda meh besalju menua ba bukit din.  Ba California, mina menua bebukit aja bisi salju.  Kami ke diau ba Galt, enti ka bemain ba salju nganjung diri ke bukit kin - tang jarang ga nganjung diri! Enda entu ka ngelaban chelap lalu enda entu ka mai kerita nengah jalai bukit lebuh maya salju bisi turun.  Enda teleba!

Nah, naka tu dulu cherita aku sekali tu.  Arapka tu ukai naka iya entry aku ba blog tu ke taun tu! :-)






Sunday, July 01, 2012

Sekeda Cherita Sekumbang di Menua

Amat enda berasai endar, genap sebulan kami tiga menyanak udah di Miri. Bala anak pan udah mupuk madah diri enda betah ke daddy saduai.

Taun tu bala anak bisi peluang belajar nyemerai. Ipar aku bisi introduce siku orang ti endang ngajar orang belajar nyemerai ba kolam di Miri din enggau ba kolam KRP di Lutong.



Tu meh gamal bala anak belajar ba hari keterubah saduai belajar nyemerai. Pengelama belajar tu semina lapan kali aja. Nya meh enti nunda penyampau kali udah belajar, kiraka tembu meh pelajar saduai, tang Denice agi enda entu nemu nyemerai. Nya aku ngasuh instructor nya nambah pelajar saduai. Hari satu tu lagi nyambung pelajar meh saduai.



Laban kami ti ukai member ba KRP, ipar aku ngulu kami kia enti bala anak belajar nyemerai ba kolam KRP. Sekali, udah bekau saduai badu belajar, anak orang putih siku bisi mai canoe kena bemain dalam kolam. Apa agi Duncan, alu iya dulu ka tama dalam canoe orang! Ninjik ga nembiak nya sigi ka bemain enggau sida tiga (nyengkaum cousin saduai). Rindang diri sida empat bemain ba kolam nembiak mit!



Maya apai enggau indai (iya mina ngibun apai aku) enda "betuchi" ba dialysis center di Miri din, kami empat makai breakfast ba kedai kupi belama. Ba kedai kupi di Lutong dia meh alai kami makai. Udah makai breakfast, bala anak bemain ba park ngimbai sungai Miri belakang pasar Lutong, semadi ke nganti indai aku meli sayur ba market.



Nyau ka ninting hari bala anak minta anjung ngagai rumah petunggal saduai. Enti nadai pengawa bukai endang dia selalu meh kami tiga menyanak semadi ke nganti jam ngambi apai enggau indai aku pulai ari dialysis center. Kekadang pansut makai tengah hari ga bala kami, tang selalu ke agi, makai ba rumah ipar aku. Tu gambar bala anak ba Permy Mall udah ke makai ba Sugar Bun.



Bejaku pasal mall, nyau tekenyit diri aku meda pemayuh kedai enggau mall digaga ba menua Lutong tu! Maya aku ke bisi pulai dalam taun 2010, bedau Permy mall ba Pujut 7 nya digaga, nya kebuah aku tegenung lebuh aku ditanya indu Cina siku enti jalai ari E Mart ba Tudan din terus ke Permy Mall. Permy Mall? Baru iya ninga nama nya!

Berunding ga aku, sapa orang ti suping ba Mall di Lutong tu ila? Ngemayuh nya mall, tang tubuh mensia nadai ga tak menambah lebih! Tang enti mall ba Lutong nya ngemanah mall ba Bintang Plaza tauka ba Imperial Mall, amat tau enda ibuh berebut enggau orang ba pasar Miri din ga aku! Nah, endang enda jauh ari rumah apai aku ga mall ba Lutong nya! Gambar simpang Lutong tu diambi ari sadau rumah apai aku!

Au, naka tu aja cherita aku sekali tu! Ila nyambung baru! Agi mayuh cherita ti deka dikunsi ditu!







Wednesday, April 25, 2012

Ngirup Teh



Nitihka utai dibacha aku, ngirup teh oolong tau ngasuh tekanan darah tinggi turun. Lama udah aku nemu pasal pemanah teh oolong, nya meh kebuah aku mupuk ngirup teh oolong suba. Mina siti aja penyalah - perut aku enda tan dibai ngirup teh! Enda milih bansa teh, ka iya oolong tauka Lipton tauka teh pait. Enti naka ngirup teh Cina lebuhka makai ba restoran Cina enda ga ngawa iga. Ninting hari ti enda ulih dibai.

Teh enggau kupi sigi pemakai ti ngundan asid (acidic). Enti pasal pemakai ti tinggi asid perut aku sigi enda tan. Bepedi perut gasak pemakai tu! Kupi, mina sechangkir sahari ti ulih diirup. Asid dalam teh bisa agi ba perut aku. Nya meh, tegal ti begaga sida karipap, sida scone, sida muffin, sida jam tart, sida sardine puff kena ngansing sida tea set, ngaga teh aku  ngambika bisi digambar lalu bisi dipeda lawa agi utai digambar! Amat lawa ga gambar aku tu neh laban ti bisi enggau teh dalam changkir! mrgreen

Perut oh perut, amat enda tan agi udah dibai ngirup teh ngenyuah nya!





Tuesday, April 17, 2012

Scones



Sekali kutai aku udah ngaga scone tang ngena chara ke muntang - ngena tepung scone ke dalam kutak. Sekali tu aku nunda recipe ari internet.  Naka pemuntang ngaga scone!  Mata enda ngaga ngelama tu!

Ngelama tu ma tenguk, meli, laban ti ngumbai diri enda nemu ngaga. Iya ga resipi ke dipeda aku ngelama tu ngena perengka ti nadai dikembuan aku ba rumah.  Resipi iya ke ditunda aku sahari tu, pemadu muntang!  Mina buah ke digulai aku kelalu mimit.  Duncan nyau nanya nama kebuah buah nya enda mayuh?  Saduai Denice selalu milih ma kek tauka roti paun ti digaga aku bisi dichampur mayuh utai.  Nya kebuah sengaja enda nyampur buah mayuh sekali tu.  Engka tak nyamai meh buah kismis enggau cranberry ke dichampur ba scone nya sekali tu sepi iya!

Kuan teh ba gambar tu utai diberi mentua aku.  Tiga set pinggai mangkuk enggau sida changkir teh ke udah diberi iya ngagai aku nadai nyengkaum kuan teh.  Nanya belama aku, engka nya iya meli ke aku siti!  Bansa ke manah diberi iya nya (Royal Albert), sida pirin enggau changkir meli kediri empu nuan, ku iya madah ke aku.  Taun nyin kemari iya ke meri kuan teh nya, lalu baru diatu aku ke meli pirin enggau changkir!  Meli ke set 5 iti aja, ngambika bisi kena ngambar sida bingka tauka kek tauka scone. mrgreen

Ukai enggai aku meli kuan ti sama bansa set ke diberi iya tang nya meh laban nya pattern lama, pedis digiga.  Bisi aku ngiga tang nadai meda alai ti bisi nyual.  Sayau amat.

Bah, nama utai diempa kita kena ngirup lemai sahari tu? Scone mega? mrgreen




Monday, April 16, 2012

Lagu Burung



Meda hari enda entu chelap iga pagi tadi, nyau aku nepas debu ari kerusi malas aku alu nganchau cushion. Ahhhh, rindu amat duduk ba luar, ninga burung belagu sambil be-internet ngena tablet duduk ba patio! Ngelama tu hari agi chelap maya pagi hari, nadai aku ka duduk ba luar ngenat chelap!

Lemai tu tadi, lebuhka mai Sandie (ukui aku) bejalai sebelah tanah, aku bisi meda burung Western Bluebird enggau burung Wren. Aku nadai kala ninga burung Bluebird belagu, tang burung Wren nyu chapuh diri iya belagu ba atas tugung dan kayu. Udahka nganjung ukui, ngambi kamera aku ngiga burung ke dipeda aku tadi. Nya ke bisi gambar dikunsi ditu. Aku bisi ninga sereta meda burung Mockingbird mega, tang lebuhka meda aku mansang, nyau ga iya terbai lari.

Aku sigi rindu ngambar burung mina musim chelap tu tadi hari selalu ujan, nya kebuah aku lembau amat pansut ngintai sida burung. Meda baka hari tu ila .. engka tau bai pansut telescope kena ngambar burung. Enda burung takut meda aku ari jauh!

Naka tu aja cherita semadi nadai aku sekali tu! mrgreen






Sunday, April 15, 2012

Cherita Masak



Lama udah aku nadai bekunsi cherita pasal masak masak neh! mrgreen Tu meh sekeda utai ti bisi dipanduk aku apin lama tu tadi.  Lebuhka meda gambar utai ke udah dipanduk bala pangan, tauka meda resipi ba internet nemu tenguk ga nyawa!  Ka pan enda manduk ke diri empu laban nadai endur semak ti tau alai makai pama nyawa udah tenguk!

Aku sigi rindu makai pemakai orang menua India.  Bisi indai tuai tambi ti diau ba menua California ditu bisi website alai iya bekunsi video enggau resipi pemakai India.  Rindu diri ga aku meda video iya lalu bisi ga nguji sekeda resipi iya.  Gambar lauk enggau roti chapati nya lauk buah terung.  Nyamai amat dipanduk chara nya sepi aku!

Aku kiraka kurang makai sida dagin manuk tauka chapi tauka janik diatu - takutka kolesterol tinggi kenu.  Aku endang diasuh lutur makai ubat kolesterol tang sengaja (nemu ke diri!) ngetu laban asaika bisi nganu tubuh ubat nya.  Nya meh aku bekareh nagang diri makai sida dagin! Gambar kway tiaw sup enggau char siew nya kena lawa aja.  Udah mangkuk kway tiaw nya digambar, char siew nya alu diengkah ba mangkuk Doug!  Tu meh siti kebuah aku rindu makai pemakai India - tebal agi masakan vegetarian pemakai orang India.

Sekumbang aku kurang agi makai lauk ti ngundan dagin, belemak, beguring, bisi endar turun berat tubuh.  Rindu amat meda berat tubuh turun! biggrin  Amat irau endar ati aku kutai meda berat tubuh majak niki!  Sigi amat ka niki ga berat tubuh pama udah manggai umur baka enggi aku tu!!   Enti enda tegal irau ke kolesterol tinggi sigi betukar saiz meh sida pakaian!!  Ngiga saiz iya ke besai agi!

Char kueh kak, bingka ubi enggau bacon and cheese muffin masakan bukai ba gambar aku tu.  Aku bisi ngaga roti paun kutai.  Amat lama udah aku enda ngaga - tegal penyakit sebengkah ga nya, tang meda bisi endar udah insur penyakit nya, belabuh baru aku ngaga roti paun.  Makai sigi tau tang nya meh anang enda nemu nagang diri.  Agi ka idup, wai!  mrgreen

Ok, nya aja cherita aku sekali tu!








Related Posts Plugin for WordPress, Blogger...